ايه منتسوري ؟
السلام عليكم ورحمة الله وبركاته
في التدوينة دي إن شاء الله هنتعرف على فلسفة المنتسوري بشكل متتابع على حلقات .
منتسوري هو منهج تعليمي وضعته دكتور ماريا منتسوري واتسمى باسمها ، المنهج دا قائم على أن الطفل بيكون جواه شخصيته ال هيكونها أما يكبر، و بتأكد على إن التربية لازم تهتم بجوانب شخصية الطفل المختلفة ( النفسية - عقلية -الحركية )
مين هي د/ ماريا منتسوري ؟
 |
| د / ماريا منتسوري |
1870 اتولدت ماريا منتسوري في مدينة انكونا في إيطاليا ، والدها كان ظابط في الجيش وكان رجل محافظ ، على عكس والدتها ال كانت متحررة.
كان في ظلم للنساء في أوروبا في الفترة دي وكانت المرأة ممنوعه من التعليم ، بس القانون دا اتغير وقدرت ماريا أنها تدخل المدرسة.
دخلت ماريا كلية الطب وكانت أول امرأة تتخرج في كلية الطب .
تم تعيينها مديرة لمدرسة للأطفال ذوي الإعاقات، فبدأت تبحث في علوم الإنسان والتربية، وبدأت تعمل أدوات مخصوصة للأطفال دول عشان تعلمهم بيها ، وقدمت لهم في الإمتحانات بتاعت الدولة ، حصل الطلاب المعاقين على درجات أفضل من الطلاب العاديين ،انبهر الناس بالنتيجة الهايلة دي ودا ال خلى د/ منتسوري تقول ”بينما كان الناس في منتهى الإعجاب بنجاح تلاميذي المعاقين كنت في منتهى الدهشة والعجب لبقاء العاديين من الأطفال في ذلك المستوى الضعيف من التعليم
لذلك فإن الطرق التي نجحت مع المعاقين لو استعملت مع الأطفال العاديين لنجحت نجاحاً باهراً" وبدأت تدور أنها تخلى الأطفال العاديين يستعملو نفس الأدوات ويتعلمو بنفس الطريقة
بعدها اتعينت دكتور ماريا مديرة على مدرسة لأبناء الطبقة العاملة في أفقر أحياء روما ، وسمتها caza de bambine ومعناها بالعربي بيت الطفل ، وفعلا غيرت محتويات البيت عشان تناسب حجم الأطفال وماتكونش كبيرة عليهم وتمثل لهم عائق .
ودا خلي الأطفال تستمتع بالمهارات العملية ال بيقومو بيها ، فتحول سلوكهم إلى الأخلاق والأدب .
انحدر نظام منتسوري سنة 1940 بسبب الحرب العالمية الأولى والثانية ، وبسبب انتقاد ويليام كليباتريك لفلسفتها ، ودا أدى إن المنتسوري يختفي في امريكا .
ماريا منتسوري اتوفت عام 1952 ودفنت في هولندا ، بس فلسفتها بدأت ترجع تنتشر تاني بفضل دكتور ماكروميك وماريو ابن ماريا منتسوري ، دكتور ماريا تم ترشيحها لجايزة نوبل للسلام 3مرات بس ما اخدتهاش ولا مرة ، وضعت صورتها على العملات والطوابع تكريما ليها.
مبادئ المنتسوري :
في كتابها اكتشاف الطفل أكدت منتسوري على عدة سمات بيتميز بيها الأطفال لازم احنا ناخد بالنا منها واحنا بنتعامل معاهم الحاجات دي زي :
_ إن الطفل بيحب يشتغل لهدف معين مش بيشتغل كدا وخلاص
_ إننا مش محتاجين نحفز الطفل أنه ينهي العمل ال بيقوم بيه لأن الدافع الداخلي عنده كافي لتحفيزه.
_ الطفل بيهتم بالحاجة ال قدامه أما تكون هتلبي رغبة داخلية عنده.
_ الطفل بيحتاج للنظام والروتين عشان يتطور
_ الطفل أما بيقوم بعمل أو بنشاط دا بيخليه في حاله من الاستواء ( يعني مش بيتشاقي) .
_ الطفل بيفهم أي معلومة معقدة لو اتقدمتله بطريقة صح .
_ التهذيب الحقيقي بيجي من الطفل نفسه مش بثواب أو عقاب ، والطفل هيسمع كلامك بجد ف كل وقت ( حتى وانت مش موجود ) أما يكون بيحبك ويحترمك مش عشان خايف .
_الطفل بيحتاج لأنشطة متنوعة تنمي جميع نواحي شخصيته وأهم الأنشطة دي هي أنشطة الحياة العملية ال بيستخدمها في حياته اليومية.
_ عاوز تساعد طفلك ! علمه يعمل الحاجة بنفسه.
_ البيئة المحيطة بالطفل بتأثر في شخصيته بشكل مباشر وقوي .
_ لما الطفل يكون موجود في مكان مناسب لحجمه دا بيساعده في النمو والتطور.
_ لازم نراقب الطفل ونعد له بيئة مناسبة ليه .
العقل الماص والفترات الحساسة:
دكتور منتسوري قالت إن الطفل ف أول ٣ سنين من عمره بيكون عنده عقل ماص غير واعي بمعنى أنه بيمص كل ال بيحصل قدامه وكل ال بيتعرضله بدون مايفهمه أو يعرف يصنفه ، ودا لأن الطفل محتاج أنه يكتسب المهارات الأساسية ال بتخليه يعيش زي الأكل والنوم والكلام ،
بعد سن ال ٣ سنوات بتسميه منتسوري العقل الماص الواعي، بيكون الطفل عنده رغبة شديدة ف الاستقلال و أنه يعتمد على نفسه ،فبيكتسب مهارات جديدة وبتتكون عنده رغبة أنه يعلم نفسه بنفسه .
الفترات الحساسة : بتتعرف على أنها حساسية خاصة عند الكائنات ال لسه بتنمو ، الحساسية دي بتخليها تعمل حاجة معينة عشان تجربها وتاخد منها حاجة وبعد كدا بتنتهي الفترة دي .
الفترات الحساسة أول حد اكتشفها هو العالم هوجو ديفري ال وضحها بمثال : " اليرقة الصغيرة أول ما بتخرج من البيضه بتكون موجودة ناحية جزع الشجرة ف الزاوية بينها وبين الغصن ، بتكون موجودة هناك أوراق الشجر الكبيرة ال بتكون صعبه على اليرقة أنها تأكلها ، ف الطبيعي أن اليرقة هتاكل الورق ال موجود قدامها ، لكن ال بيحصل ان اليرقة بتخرج ناحية طرف الغصن ناحية الورق الصغير ال هو صالح لاكلها ، ودا خلي هوجو ديفري يتعجب ويبحث ف الموضوع واكتشف ان اليرقة بيكون عندها حساسية شديدة للضوء ودا بيخليها تمشي ناحية طرف الغصن ، وبعد فترة أما بتكبر اليرقة الحساسية دي بتختفي".
العالم هوجو ديفري اكتشف الفترات الحساسة ف الحيوانات لكن ماريا منتسوري اكتشفتها ف الأطفال .
الطفل لازم يكون عنده ما يلبي احتياجاته ف الفترات الحساسة بتاعته لأن التعلم ف الفترة الحساسة بيكون أقل ف الوقت والمجهود ودا ال بيخلي الأطفال تحفظ أسرع من الكبار .
طب أنا ازاي اعرف ان ابني بيمر بفترة حساسة؟:
_ بيكون عاوز النشاط دا ومش قادر يسيبه.
_ بيندمج تماما ف النشاط ال بيقوم بيه وبيكمله
_ بيعيد النشاط أكتر من مرة
_ بيرتبط بالنشاط عاطفيا
_ أما بيخلص النشاط بيكون مبسوط
...ليه ممكن نختار منتسوري ؟
في مشاكل كتير بتقابل الأطفال وبتعيق نموهم وتطورهم :
_ فكرو كدا هل ولادكم عندهم الحرية الكاملة أنهم يتحركو أو يعملو اي حاجة ! الحقيقة لا ، احنا كل أما الطفل يقرب من أي حاجة عشان يلمسها بنكهربه وبمنعنه،، كل حاجة لا ماتلمسش وماتمسكش وماتتحركش .
طب الطفل المحبوس دا هيكون عنده مشكلة ايه ؟ حواس الطفل عشان تشتغل لازم تتعرض لمثيرات و خبرات مختلفة ، وكل أما كانت الخبرات اكثر وأفضل الحواس هتطور بشكل أحسن ، احنا أما بنحبس الطفل ونقيده ف الفترات الحساسة دا بيعيق نموه _الفترات الحساسة دي موجودة عند كل الأطفال بس كل طفل بيتعرض لخبرات مختلفة عن التاني _ البيت والمدارس العاديين بتقيد حركة الطفل لأنها مش بتوفر الخبرات ال بيحتاجها لدعم تطوره .
_ لو سيبنا الطفل حر هياذي بيئة الكبار ، وبيئة الكبار مؤذية لتطور الطفل،الحاجات ال مصممة بحجم يناسب الكبار مش بتكون مناسبة ابدا للاطفال جربو مثلا تاكلو بالمغرفة !
_ طيب الطفل مش لاقى حاجة مناسبة يعملها لأن هو ممنوع يتحرك أو يمسك حاجة ، دا بيخليه يتشاقي ويزعجنا،لأنه بينزعج من منعه ان يلمس حاجة او يتحرك ، حالة الاستواء بتيجي عند الطفل أما تكون رغباته مجابة.
_ كل حاجة الأطفال بتحاول تعملها بيلاقونا جرري بنساعدهم ونعملها مكانهم ودا بيخلي الطفل اعتمادي من الدرجه الاولى ، المساعدة الحقيقة ال نقدمها للطفل اننا نعلمه يعمل الحاجة بنفسه .
عشان كدا الطفل بيحتاج لمكان مصمم بدقة لدعم تطوره عشان يتحرك فيه بحرية و مش يزعج حد
لذلك أسست ماريا منتسوري بيت الطفل و جعلته مناسب لحجم واحتياجات الطفل .
في نهج منتسوري الطفل هو ال بيكون قائم بعملية التعلم بيستمر ف أداء النشاط لحد ما يتمكن من أنه يشرحه لاقرانه ، عشان كدا دور معلم منتسوري هو تسهيل عملية التعلم ، وبرضو مش بيكون فيه تنافس بين الأطفال وبعض بالعكس ف فصل منتسوري بيكون فيه تعاون وتكامل بين ألاطفال عشان كدا فصل منتسوري بيبقا شبه الجو الأسري لإن كل طفل ليه دور محدد بيقوم بيه ولأن الفصل الواحد بيكون فيه أعمار مختلفة ودا برضو بيساعد على إن :
_ الأطفال الكبار بيكتسبو ثقة ، وبيكونو قدوة للاصغر سنا .
_ الأطفال بتتشجع أنهم يقومو بأنشطة اكتر
_ الطلب على الأدوات التعليمية هيكون بشكل متوازن لأن كل طفل بيقوم بنشاط مختلف .
في نهج منتسوري كمان بينتقلو للأفكار المجردة من خلال الملموسات لأن الفكرة المجردة مش هتثبت ف دماغ الطفل ويفهمها إلا إذا تعرضلها بحواسه.
التهذيب في فصل منتسوري:
طيب بالنسبة لتهذيب الأطفال ف منتسوري هل بيتم بالعقاب والحرمان ولا بيتم ازاي ؟
الطفل ف فضل منتسوري بيكون عنده حرية لان مفيش منع وحرمان ، لكن الحرية دي مقيدة بنظام ، ودا بيخلي الطفل يكون مهذب من جواه من غير اي عقاب ، لأن الطفل بيحترم السلطة ال منحته الحرية والاستقلالية دي ، ولأن مش بيكون عنده مقاومة لإن مفيش ضغط عليه .
مستويات الطاعة عند الطفل :
_ الطفل قبل ما يتم ٣ سنوات بيبقا غير قادر على طاعة الأوامر إلا لو كانت بتلبي رغبة عنده .
_ بعد ٣ سنوات بيفهم رغبة ال قدامه وبالتالي بيتفاعل معاها سواء بالطاعة أو بالعصيان .
_ الطاعة المبهجة يعني الطفل بيطيع الشخص البالغ وهو سعيد لأنه بيقدر قيمة الطلب ال بيطلبه منه .
كمان أنشطة الحياة العملية بتدعم تهذيب الطفل من خلال طريقة السلام وحل الخلافات في دروس اللياقة ، النظافة والاعتماد على النفس ، الطفل أما بيكون عارف المفروض يتصرف ازاي ف المواقف المختلفة دا بيزيد ثقته ف نفسه وبيطور عنده التهذيب.
دور الآباء في دعم تهذيب الطفل :
لازم الآباء يدو حرية واستقلالية للطفل عشان طاعته ليهم تكون نابعه من الحب والاحترام مش م الخوف من العقاب أو الطمع في الثواب.
وحل المشاكل المفروض يكون بنظرة مستقبليه مش حل مؤقت وخلاص .
زهرة السلام :
الأطفال هم الأمل ان السلام يعم في العالم ، ودعم تعليم الأطفال السلام بيتم في فصل منتسوري من خلال :
_ الوعي الذاتي : وعي الطفل بجسمه وروحه وعقله بيولد عنده سلام داخلي .
_ الوعي المجتمعي : الطفل ف منتسوري فرد فعال ف مجتمع صغير ، بينمي عنده احترامه للآخر وتحمل المسؤولية تجاه الفصل والمجتمع.
_ الوعي الثقافي : الطفل ف منتسوري عارف ان في ناس غيره موجودة وعليه أنه يتقبل وجودهم ( مبدأ وجود الآخر )
_ الوعي البيئي : حرص الطفل على البيئة والعناية بها وتقديرها والمحافظة عليها بيرطب ف ذهن الطفل وبتدعمه دروس الحياة العملية.
تعليقات
إرسال تعليق