انشطتنا اليومية

السلام عليكم ورحمة الله وبركاته
تدوينة اليوم هتكون إجابة للناس ال سألتني عن الأنشطة ال بقوم بيها مع معاذ
احنا بنعمل نشاط واحد ف اليوم تقريبا عشر دقايق بس أو اكتر على حسب ما يمل منه معاذ
أمثله على الانشطه :
سلة الكنز :

من أهم الانشطه ال بتتقدم للطفل هو نشاط سلة الكنز ، هي عبارة عن سلة أو علبة بنحط فيها حاجات مختلفة.
من مميزاته أنه مش مكلف بتقدميه بأدوات موجودة عندك بالفعل، وأنه بيتقدم من سن صغير (أول ما الطفل بيبدأ يقعد ) ولسن كبير، وبتقدري تجددي فيه.
سلة الكنز ممكن نحط فيها تباينات للالوان أو للخامات أو للاقمشه، للأصوات، للروائح، للاشكال ، أو اي فكرة تيجي على بالنا وبنسيب الطفل يستكشف فيها لوحده بدون تدخل.

اسطوانات الصوت :

من ركن الأنشطة الحسية - حاسة السمع
عبارة عن مجموعتين من الاسطوانات كل اسطوانه ليها شبيهتها في المجموعه التانية بتصدر نفس الصوت.
فايدة الاسطوانات دي إنها بتقوى حاسة السمع،
و بتخلي الطفل قادر على تحديد وتفريق الأصوات، الطفل أما بيسمع أصوات كتيرة مختلفه بياثر بشكل إيجابي على نطقه للحروف.
اسطوانات الصوت ممكن عملها بسهوله ف البيت.
صندوق بقاء المادة:

الصورة من جوجل

نشاط مهم جدا للأطفال ممكن من عمر ٧ شهور أو أقل بيعلم الطفل أن الحاجات لما بتختفي بتبقا موجودة ف مكان ما .
بيزيد من التآزر الحركي البصري عند الطفل بينسق حركة ايده وعينه وهو بيحط الكرة
فكرته بسيطة ممكن يتعمل في البيت.

برج الحلقات :

الصورة من جوجل

مجموعة حلقات مختلفة ف الأحجام والألوان فيها فتحات بتدخل ف العمود، فايدته زيادة التازر الحركي البصري وبيعرف الطفل فرق الأحجام.
طبعا لازم اوضح ان مش كل الانشطة دي بتخلص في سلام ،لأن ف معظم الأوقات سلة الكنز بتترمي ف الأرض،والحلقات بتتلبس غوايش،...
المهم أن الطفل يتعرض للنشاط ويتعرف على حاجات مختلفة.