انشطتنا اليومية ٢ من سن سنه ونصف

السلام عليكم ورحمة الله وبركاته

التدوينه دي هجمع فيها بعض أنشطة معاذ اليوميه المناسبة من سن سنه ونص

نشاط مطابقة الألوان 

عبارة عن صينية علب الزبادي هي صينيه فيها فتحات لونت كل مكان منهم بلون وجبت بكر خيط بنفس الألوان والمطلوب من معاذ أنه يطابق الألوان مع بعض 

نشاط نقل المواد الصلبة بالمعلقة 

طبقين واخد فيهم فيه حمص ومعلقة بيقوم بنقل الحمص من الطبق المليان للفاضي باستخدام المعلقة وبعدين يرجعه تاني ف نفس الطبق
ملاحظة الحمص مش كتير عشان ما يزهقش
معاذ زهق من المعلقة و النشاط أتحول لنشاط صب بعد كدا 😂😂

نشاط صب المواد السائلة

وعاء فيه مايه و واحد تاني فاضي بيمسك المليان بهدوء ونصب ف الفاضي الفوطة عشان نمسح بيها الماية ال هتقع أثناء النشاط
ملاحظة أن المايه ماتكونش اكتر من ال حاجة ال هنصب فيها
طبعا النشاط دا ما كملش لأن معاذ عنده هواية أنه يكب اي سوائل ع الأرض اليومين دول

نشاط صب المواد الصلبة 

دا أول نشاط بنقوم بيه ف أنشطة الصب لإن المواد الصلبة أسهل
أنا استخدمت حمص ممكن نستبدله بمكرونه أو عدس أو فاصوليا اي حاجة متوفرة
بنقوم بصب المادة بين الإناءين

نشاط تتبع الكرات 

قطعت زجاجات عندي وعملت بيهم مجرى الكور بحيث أن نحط الكورة تنزل من ازازة للتانية وبعدين تقع على الأرض

نشاط الحصاله 

عبارة عن علبه عملت فيها فتحة زي الحصاله وفلوس معدن بيدخل ف الفلوس ف العلبه من الفتحة النشاط دا عجبه جدا وكان بيركز فيه كتير

نشاط تلوين 

جبت ورقة كرتون جامدة وقسمتها مثلثات و كنت بغطي كل المثلثات بورق واسيب واحد بس مكشوف ومعاذ كان بيلون أما يخلص مثلث اغطيه واظهر واحد تاني ونغير اللون (معاذ ال اختار كل الالوان أنا ال اخترت مكانهم )وهكذا لحد ما خلصنا المثلثات الفكرة جاتلي من النقاشة أما بنبيض الحيطان اكتر من لون
 المثلث الكبير علمته يخبط بس بالفرشة (عملت قدامه وهو قلدني) عشان يعمل نقط كتير جنب بعض
آخر خطوة جبت لصق الأعمال الفنية وعملته برواز للوحه 😂😂