اختيار حضانة الاطفال

السلام عليكم ورحمة الله وبركاته
في التدوينة دي هنتكلم عن ازاي اختار حضانه أولادي
الحضانة هي أول الحلول ال بتيجي ف بال اي ام عندها انشغالات عن أولادها سواء كانت عامله أو حتى عاوزة تفضي وقت لنفسها عشان تشوف مسئوليه بيتها ،
وساعات بيكون اختيار اني أودي أطفالي الحضانه وارد بدون إي أسباب متعلقة بالام بس هي بقت شايفة ان الولد أو البنت كبرو ولازم يروحوا حضانة يتعلمو ويبقوا اجتماعيين ويستقلو بنفسهم
طيب عاوزين نسأل نفسنا شويه أسئلة كدا قبل ما نقرر حاجة ف موضوع الحضانه دا
1_ هل أنا  محددة السبب ال مخليني أودي ولادي الحضانه خصوصا لو ف سن صغير
2_ هل أنا ببحث بين الحضانات وافاضل بينها عشان اختار الاحسن لولادي
3_ ايه هو الاحسن للولاد بالفعل مش الاحسن من وجهة نظري انا كأم
4_ ال هيتعلموه الولاد من الحضانه حاجات ايجابيه بس !
5_ مين الميسات والمشرفات على الحضانه !
كفايه كدا اسئلة ونجاوب بقا
_ أنا أما ابقا عارفه انا موديه ولادي الحضانه لييه محددة الهدف بالتالي هيسهل عليا الاختيار  مثلا أنا ماعنديش مساحة ف بيتي الولاد يخرجوا فيها طاقتهم الحركية بالتالي أنا مودياهم الحضانه عشان يلعبو ويجرو مش هختارلهم ساعتها حضانه اوضه وحمام لازم يبقا فيها جنينه واسعه يجرو فيها براحتهم وهكذا كل أما احدد الهدف كل أما الاختيار  يبقا سهل
_ ما ينفعش برضو اني اوديهم أول حضانه تقابلني ولا الحضانه ال ع ناصية الشارع عشان قريبة وخلاص لازم أدور ف الحضانات كلها واشوف ايه ال يناسبني ويناسب الولاد ويتماشي مع القوانين ال أنا بتعامل بيها مع الولاد ف البيت وأسلوب التربيه ال ماشيه بيه معاهم يعني لو أنا مقتنعه بأسلوب التربية الايجابيه ومش بزعق ع اد ما اقدر ما ينفعش أودي ولادي حضانه بتستخدم اسلوب الثواب والعقاب والنوتي كورنر ولا الضرب ، واشوف الحضانه نفسها مساحتها نضافتها ديكوراتها وبالمناسبه دي الديكورات المبهرجه ورسومات الكرتون ال ماليين كل الحضانات دليل على أن المكان دا لا يصلح للأطفال الرسومات الكتير والحاجات الكتير المتعلقة ع الحيطان بتشتت انتباه الأطفال ف بالتالي الولاد بيبقا تركيزهم ضعيف،
فأنا لازم اشوف كل الاختيارات المتاحة قدامي واختار الا فضل .
_ ايه هو الاحسن بالفعل النقطة دي مهمة جدا جدااا جداااا
كل واحد وجهة نظره بتختلف ف النقطه دي بيختار ال عاجبه هو مش ال فعلا مناسب للأطفال زي نقطة الديكورات ال ذكرناها فوق ممكن تلاقي ام لو لقت حضانه مافيهاش رسومات كرتون وحيوانات تنتقدها وتقول ازاي وماترضاش تودي ولادها فيها مع ان هو دا ال المفروض تدور عليه اصلا
حاجات اساسيه ف الحضانه واحنا بنختارها
_المساحه  الواسعه
- كثافة الأطفال ف الغرفه لازم تبقا قليله
_ نضافة المكان وتطهيره
_ لازم الغرفه تكون فيها تهوية
_ الإضاءة لا تكون قويه جدا ولا ضعيفه ف الحالتين بتؤذي عين الطفل
_ الاثاث والادوات ال بيستخدمها الطفل لازم تكون مناسبه لحجم الطفل
_الشبابيك لازم تكون أمان للأطفال مايقعوش منها و ف نفس الوقت تكون بتدخل نور الشمس 
_ الحمامات لازم تكون مناسبه لحجم الطفل أو ع الاقل فيها قطع تساعده يستخدم الحمام  ال بالحجم الكبير لوحده
_ المكان ال فيه الحضانة ماينفعش أودي ولادي حضانه ف مكان مش أمان أو فيه بلطجه
دا بالنسبه لتصميم الحضانه نفسه
_ أما بالنسبه للمحتوى ال بتقدمه الحضانه للأطفال فأي كان المنهج ال بتدرسه الحضانه لازم تراعي نقطه ان الاطفال نمط تعليمهم ف أول سنين عمرهم بيبقا حسي حركي يعني لازم يشوفوا الحاجة ويلمسوها ويتعاملو معاها بشكل مباشر عشان يتعلمو عنها مش تعليم أكاديمي وخلاص
_لازم نحط ف بالنا ان ولادنا هيختلطوا بثقافات تانيه غيرنا وهيتاثرو بيهم ونعمل حساب ان مش كل ال هيتعلموه ف الحضانه حلو فيه ولاد كتيير بيتعلمو الشتيمة والضرب وغيره ف الحضانه عشان كدا لازم اركز لو هودي ابني حضانه فإني اختار الحضانه دي كويس والبيئة ال هي فيها

_اخر نقطه هتكلم فيها هي المعلمات ال بيعلمو ولادنا والمشرفات ، مؤخرا بقا اي واحده مش لاقيه شغل وعاوزة تشتغل تفتح حضانه ف بيتها أو تروح تشتغل ف حضانه بغض النظر عن هي معاها ايه أو ثقافتها ايه فى معتقدنا ان اي أنثى مؤهلة لانها تربي اطفال!
فترة الطفوله دي فترة حساسة جدا عقل الطفل وشخصيته بيتكونوا ف الفترة دي  أقل حركة أو نظرة بتأثر فيه بيكون عامل زى السفنجة ال بتمص كل حاجة حواليها من غير فلترة ، لازم المعلمات ال بيشتغلوا مرحلة طفوله مبكرة يكونوا عارفين تربيه كويس حتى لو بيغلطو شويه وبيعملوا دروبات دا هيكون الاستثناء مش القاعده
حاجة كمان لازم معلمة الحضانه تكون متمكنة منها وهي المنهج ال هي بتدرسه مش معقول تدرس انجليزي وهي مابتعرفش تنطق صح
أنا أعرف بنوته كانت حافظة قرآن بالتجويد وبعد ما راحت الحضانه بقت بتنطق التشكيل غلط مع أنها كانت بتقرا كويس جدا من غير ولا غلطه
مهم جدا اننا نختار  الأماكن والناس ال ولادنا بيحتكو بيهم لأنهم هيأثروا فيهم بأي شكل من الأشكال .
#هدير_آدم