الالعاب التعليمية

السلام عليكم ورحمة الله و بركاته 

إن شاء الله هعرض عليكم النهاردة بعض الألعاب التعليمية والأنشطة المناسبه لسن عام و 9 شهور وممكن تناسب سن اصغر واكبر طبعا

1- لعبة برج المكعبات
مكعبات فيها فتحات اشكال مختلفة ومعاها قطع الاشكال دي المفروض ان الطفل بيدخل القطع ف المكعب وبيرص المكعبات كمان اما افقي او عمودي او بأي شكل تاني
اللعبة مفيدة ف تقوية عضلات الايد والتآزر الحركي البصري و التمييز البصري و معرفة الأحجام والأشكال المختلفة

برج المكعبات

2- لعبة قطار الاشكال الهندسية 
قطر فيه عمدان واشكال هندسيه كل شكل مفتوح ع حسب عدد العمدان ال هتدخل فيه مطلوب من الطفل يركب الشكل ف القطر .
هو قطر بس انا فكيته من بعضه عشان اقدمه على مرحلتين عشان  تدرج الصعوبة
اللعبة مفيدة جدا ف تقوية عضلات الايد و زيادة التركيز و التآزر الحركي البصري و زيادة الحصيلة اللغوية

قطار الاشكال الهندسية 

3- ال بلوكس ( وحدات البناء) 
قطع اشكال هندسية مختلفة تستخدم لعمل اشكال كثيرة
اللعبة دي بتنمي جانب التخيل عند الطفل و بتزيد من ابداعه

البلوكس - وحدات البناء

4- العمدان
عبارة عن قطعة من الفوم المضغوط فيها فتحات و عمدان او مسامير بلاستيكيه بتتركب ف الفتحات دي و بتتركب ف بعضها
اللعبة جميلة جدا لتعلم الألوان و الأنماط وكمان العد
برضو بتزيد من التركيز و تقوية عضلات الايد و تهيئتها للكتابة

العمدان

5- نشاط مطابقة  
دا بيتقدم بعد ما بيكون الطفل اتعرف على المجسات والفلاش كاردز واتقنها كويس
بنرص البطاقات ونطلب من الطفل يطابق كل مجسم مع الكارت ال عليه صورته
النشاط مفيد في تنشيط الذاكرة و التركيز و زيادة الحصيلة اللغوية

نشاط مطابقة

6- بازل 
لازم نراعي واحنا بنقدم البازل للطفل التدرج من الاسهل للاصعب
فلازم نبدأ  ببازل قطعه واحدة و بعد ما الطفل يتقنه نخليهم قطعتين وهكذا بعد ما الطفل يتقن البازل ال بيشتغى بيه نزود عدد القطع
البازل دا انا عملته ف البيت باستخدام فلاش كاردز و خوافض اللسان او قطع بلاستيكيه

بازل قطعتين