طفلي / هدير ادم

السلام عليكم ورحمة الله وبركاته التدوينه دي هجمع فيها بعض أنشطة معاذ اليوميه المناسبة من سن سنه ونص نشاط مطابقة الألوان   عبارة عن صينية علب الزبادي هي صينيه فيها فتحات لونت كل مكان منهم بلون وجبت بكر خيط بنفس الألوان والمطلوب من معاذ أنه يطابق الألوان مع بعض  نشاط نقل المواد الصلبة بالمعلقة  طبقين واخد فيهم فيه حمص ومعلقة بيقوم بنقل الحمص من الطبق المليان للفاضي باستخدام المعلقة وبعدين يرجعه تاني ف نفس الطبق ملاحظة الحمص مش كتير عشان ما يزهقش معاذ زهق من المعلقة و النشاط أتحول لنشاط صب بعد كدا 😂😂 نشاط صب المواد السائلة وعاء فيه مايه و واحد تاني فاضي بيمسك المليان بهدوء ونصب ف الفاضي الفوطة عشان نمسح بيها الماية ال هتقع أثناء النشاط ملاحظة أن المايه ماتكونش اكتر من ال حاجة ال هنصب فيها طبعا النشاط دا ما كملش لأن معاذ عنده هواية أنه يكب اي سوائل ع الأرض اليومين دول نشاط صب المواد الصلبة   دا أول نشاط بنقوم بيه ف أنشطة الصب لإن المواد الصلبة أسهل أنا استخدمت حمص ممكن نستبدله بمكرونه أو عدس أو فاصوليا اي حاجة متوفرة بنقوم بصب ال...

السلام عليكم ورحمة الله وبركاته النهاردة هكتب لكم عن تجربتي في عمل كتاب لمعاذ، الكويت بوك أو الكتاب التفاعلي هو الحقيقة أنا مش عملاه تفاعلي اوى لانى ف الأول كنت عاوزة اخليه كتاب مشاعر أعرفه ع بعض الانفعالات من خلال الكتاب دا وبعدين قررت اني هحطله فيه أنشطة كمان بس لسه ما كملتهاش كلها الكتاب أنا عملته من قماش الجوخ الانفعالات عملاها من الفوم قوس الألوان ال ع الغلاف عملاه ع جوخ ابيض وملوناها بالوان البوستر لأن مكانش عندي فوم ولا جوخ ملون ربطت صفحات الكتاب ببعض ب رابط الكبلات والفكرة دي اقتبستها من دكتورة دعاء مجدي لانى لقيته أوفر من اني اعمله بحلقات ودي صفحات الكتاب وهنا أول نشاط تفاعلي ف الكتاب المفروض أن معاذ ينشر الغسيل ويلمه يحطه ف طبق الغسيل النشاط مفيد لتقوية عضلات اليد وهنا نشاط فتح وقفل السوسته برضو مفيد في تقوية عضلات الايد وتدريب الطفل على فتح وقفل السوسته ف حياته العملية بعد كدا لسه في أنشطه تانية ان شاء الله ناويه احطها في الكتاب وكمان أكمل كتابة اسامى الانفعالات، اسامى الانفعالات كتبتها بالفوم بس الموضوع دا كان مرهق لانى كنت مضطرة ا...

كتب تعليم العقيدة السلام عليكم ورحمة الله وبركاته تعليم الطفل العقيدة ف سن صغير دا بيخليه مرتبط بالدين بشكل أكبر ولأن عبادة ربنا هي الهدف الأساسي ف حياتنا ، واحنا لازم نزرع المعنى دا ف ولادنا عشان  ماينسوش هم اتخلقو ليه قال تعالى "(وَمَا خَلَقْتُ الْجِنَّ وَالْإِنْسَ إِلَّا لِيَعْبُدُونِ) " صدق الله العظيم [Surat Adh-Dhariyat عشان كدا ف التدوينة دي ان شاء الله هجمعلكم لينكات لكتب تعليم الأطفال العقيدة كتيب أنا مسلم : كتيب عقيدة للأطفال … تفاعلي ممتع .. يشرح  الإسلام و الإيمان و الإحسان بطريقة مبسطة مشوقة  لتحميل الكتاب   من هنا كتيب صلاتي : كتاب أنشطة مميز.. جاهز للطباعة … لتعليم  الصلاة للأطفال  …  يشمل معلومات كاملة حول  الصلاة و أدائها مشروحة بطريقة مبسطة  مناسبة للأطفال .. بالإضافة للعديد من  الأنشطة  المسلية .. والأسئلة التي تشجع الطفل على البحث   لتحميل الكتاب من هنا قصص من التاريخ الإسلامي للأطفال : من هنا منهج نماء: من هنا

السلام عليكم ورحمة الله وبركاته في التدوينة دي إن شاء الله هنتعرف على فلسفة المنتسوري بشكل متتابع على حلقات .     منتسوري هو منهج تعليمي وضعته دكتور ماريا منتسوري واتسمى باسمها ، المنهج دا قائم على أن الطفل بيكون جواه شخصيته ال هيكونها أما يكبر، و بتأكد على إن التربية لازم تهتم بجوانب شخصية الطفل المختلفة ( النفسية - عقلية -الحركية ) مين هي د/ ماريا منتسوري ؟ د / ماريا منتسوري 1870 اتولدت ماريا منتسوري في مدينة انكونا في إيطاليا ، والدها كان ظابط في الجيش وكان رجل محافظ ، على عكس والدتها ال كانت متحررة. كان في ظلم للنساء في أوروبا في الفترة دي وكانت المرأة ممنوعه من التعليم  ، بس القانون دا اتغير وقدرت ماريا أنها تدخل المدرسة.  دخلت ماريا كلية الطب وكانت أول امرأة تتخرج في كلية الطب . تم تعيينها مديرة لمدرسة للأطفال ذوي الإعاقات، فبدأت تبحث في علوم الإنسان والتربية، وبدأت تعمل أدوات مخصوصة للأطفال دول عشان تعلمهم بيها ، وقدمت لهم في الإمتحانات بتاعت الدولة ، حصل الطلاب المعاقين على درجات أفضل من الطلاب العاديين ،انبهر الناس بالنتيجة الهايلة دي ودا ...

السلام عليكم ورحمة الله وبركاته تدوينة اليوم هتكون إجابة للناس ال سألتني عن الأنشطة ال بقوم بيها مع معاذ احنا بنعمل نشاط واحد ف اليوم تقريبا عشر دقايق بس أو اكتر على حسب ما يمل منه معاذ أمثله على الانشطه : سلة الكنز : من أهم الانشطه ال بتتقدم للطفل هو نشاط سلة الكنز ، هي عبارة عن سلة أو علبة بنحط فيها حاجات مختلفة. من مميزاته أنه مش مكلف بتقدميه بأدوات موجودة عندك بالفعل، وأنه بيتقدم من سن صغير (أول ما الطفل بيبدأ يقعد ) ولسن كبير، وبتقدري تجددي فيه. سلة الكنز ممكن نحط فيها تباينات للالوان أو للخامات أو للاقمشه، للأصوات، للروائح، للاشكال ، أو اي فكرة تيجي على بالنا وبنسيب الطفل يستكشف فيها لوحده بدون تدخل. اسطوانات الصوت : من ركن الأنشطة الحسية - حاسة السمع عبارة عن مجموعتين من الاسطوانات كل اسطوانه ليها شبيهتها في المجموعه التانية بتصدر نفس الصوت. فايدة الاسطوانات دي إنها بتقوى حاسة السمع، و بتخلي الطفل قادر على تحديد وتفريق الأصوات، الطفل أما بيسمع أصوات كتيرة مختلفه بياثر بشكل إيجابي على نطقه للحروف. اسطوانات الصوت ممكن عملها بسهوله ف البيت. صندوق بقاء الما...

دكتور ماريا منتسوري قالت ان الطفل من ساعة الولادة بيكون حساس للنظام . النظام بيساعد الطفل على تنمية إدراكه لأن الطفل ف أول عمره مش بيكون مستوعب أنه شئ منفصل عن المكان اللي حواليه. النظام دا بينقسم إلى : -نظام مكاني -نظام اجتماعي _نظام حسي - نظام زمني  النظام الزمني هو أي حاجة بنعملها كل يوم ، لازم يكون فيه حاجات ثابته كل يوم لأن الطفل بيحب الحاجات ال هو بيبقا متوقع حدوثها. روتين معاذ اليومي  : مش ثابت كله بس في حاجات لازم تتعمل كل يوم  - أما بيصحا بنقول الأذكار ( طبعا انا بقولها بصوت عالي و واضح وهو بيسمع ) _ الفطار _ لعب حر ( غالبا بالكورة بنحدفها لبعض ) _ نشاط  _ قراءة القرآن _ خروج م البيت أو نقف ف البلكونه _ باقي اليوم لعب حر  _قراءة قصص  _ وقت النوم طبعا ثبات الروتين ال قبل النوم دا بيساعد الطفل أنه ينام بسرعه، وأننا نفرقلهم بين الليل والنهار أول مايتولدو دا بيساعد على تنظيم نومهم .

موقف بيحصل مع كتير مننا نكون ف مكان مع ولادنا ونقابل حد نعرفه -سلم يا حبيبي على عمو -لا -سلم يا ولد يا قليل الذوق كدا عيب     وتبدأ وصله من التهزيق والتعنيف للطفل ، ودا كله طبعا قدام الناس ومواقف كتير جدا غير كدا بنلاقي نفسنا بنزعق لولادنا ونشتمهم احيانا.. طيب قبل إي حاجة هل لو حد هزقك قدام الناس هتفرح وتبقا عادى! هتقول ان دا طفل وانت راجل او انتي ست ناضجين ف ما ينفعش حد يعمل فيكو كدا ! ومين قال إن ابنك عشان هو طفل ينفع تهزقه أو تزعقله وخصوصا قدام الناس ! السب والشتائم للطفل بتتسبب في 1_ عدم الثقه في النفس_ شخصيته بتبقا مهزوزة 2_الخوف من التعامل مع الآخرين_لأنه فاقد الثقة في الناس 3_الخوف من أداء أي مهمة _لأنه خايف يغلط فيتهزق  4_عدم الإحساس بالامان 5_التبعية_ لأنه مالوش رأي وحاسس أنه طول الوقت غلط ولادنا شخصيتهم بتتكون على أيدينا لسه واحنا المؤثر الاساسي ف الشخصيه دي عشان نعرف نربيهم صح لازم نحط نفسنا مكانهم ونفهم أنهم ناس عندهم مشاعر بس عقلهم واستيعابهم لسه بيتكون